Un dos clásicos das casetas do polbo de San Froilán, Manolo de Marce, parece renunciar definitivamente ao negocio do feiral e nin sequera presentou oferta ningunha na nova poxa organizada polo Concello. Por contra, Aurora de Carballiño e a súa familia xestionarán dúas das casetas.
Esas son as principais novidades do resultado da poxa, que se completa coa presenza xa esperada doutros dous históricos, A Palloza e Torre de Núñez. Entre os catro restaurantes e os catro caldeiros, o Concello ingresará ao redor de 133.000 euros por cada un dos dous anos polos que se realizou a adxudicación.
Hai que recordar que este novo procedemento iniciouse precisamente a petición dos propios hostaleiros, que alegaron que a extraordinaria subida do polbo non lles permitía manter os prezos das racións marcados polo Concello na anterior poxa, que eran de 8 euros. Ante a imposibilidade de modificar esta condición, e de acordo co Concello, os catro adxudicatarios presentaron as súas renuncias para que se puidese completar un novo proceso, no que a ración se fixou a 12 euros.
Nestas condicións, o último día do prazo recibíronse catro ofertas, que eran as esperadas e que fixeron dar por suposto que cada un dos catro conservaría a súa caseta e o seu caldeiro correspondente. A sorpresa foi que Manolo de Marce non chegou a presentar oferta ningunha, mentres que Juan Pazo Varanda, fillo de Aurora de Carballiño, presentou tres poxas: dúas no seu nome polas casetas e caldeiros 1 e 2 e unha terceira en nome de Pulperías Aurora pola caseta e caldeiro 1.
Deste xeito, a caseta 1, que saía por 18.772 euros, foille adxudicada a Juan Pazo por 24.100. Con todo, en ámbitos municipais dáse por feito que ao final renunciará á mesma, que será adxudicada a nome de Pulperías Aurora por 20.772.
O mesmo sucede co caldeiro 1, que saía por 11.714 euros: a poxa gañadora é de novo a que presentou Juan Pazo ao seu nome, de 15.714 euros, aínda que é posible que renuncie en favor da que presentou a nome de Pulperías Aurora, de 13.714.
Pola caseta e o caldeiro 2, con todo, Juan Pazo só presentou unha poxa. O restaurante, que saía en 17.700 euros, adxudicoullo en 26.200, mentres que pagará 16.004 euros por un caldeiro que partía de 11.044.
Este diario tratou de porse este venres en contacto con Pazo para confirmar que a intención é explotar ambas as instalacións, pero non foi posible falar con el.
Menos movementos e tamén menos diferenza entre os prezos de saída e os finais houbo nos outros casos. Ramiro López, propietario da Palloza, presentou as únicas ofertas pola caseta e o caldeiro 3: polo restaurante, cun prezo de saída de 16.627 euros, pagará 18.630; quedouse o caldeiro por 11.425, mentres que saía por 10.375.
AO CÉNTIMO. Moito máis confiados estiveron os representantes de Torre de Núñez: as súas poxas pola caseta e o caldeiro 4 só estiveron 0,60 céntimos por encima dos prezos de saída. Así, esta firma poderá montar o restaurante por 16.628 euros e o caldeiro por 10.376.
Ábrese agora un prazo de dez días hábiles para que os adxudicatarios presenten a fianza (un cinco por cento do total ofertado) e a documentación necesaria. Entre outras cousas, deben de estar á corrente dos pagos á Seguridade Social e demostrar ser unha empresa con experiencia no sector.
Esta última foi unha das condicións novas que se incluíron nesta poxa a petición dos propios hostaleiros, para evitar casos como o de Bruxa Consulting, firma ligada a Javier Irimia, que hai tres anos rebentou a poxa ao quedar con tres casetas, ao final explotou dúas e un ano despois renunciou a todo obrigando a unha nova poxa.
