Un informe remitido o mes pasado ao Concello polo ente autonómico Augas de Galicia cualifica como "moi deficiente" a valoración da calidade global do funcionamento da Estación Depuradora de Augas Residuais (Edar) de Lugo, unha moderna instalación que foi inaugurada hai sete anos.
O grupo popular desvelou este martes este informe, no que se indica que a Edar lucense incumpre as esixencias de autorización de verteduras para os parámetros analizados en tres mostras tomadas dun total de dez e que detecta varios incumprimentos da normativa vixente, como niveis de fósforo ou nitróxeno superiores ao permitido.
Ademais, no informe apúntanse outras deficiencias, como que as reixas de grosos de limpeza automática están avariadas ou que as bombas de recirculación interna contan cunha capacidade menor que a establecida, o que limita a desnitrificación.
O informe de ademais catro recomendacións técnicas ao Concello para tratar de reverter esta situación na planta lucense, na que se depuran as augas residuais da cidade e que logo son de novo vertidas ao río Miño.
O portavoz popular laméntase ademais que o deficiente funcionamento da Edar de Lugo supón un risco para a saúde
Así, Augas de Galicia expón incrementar a concentración de sólidos en suspensión no licor mestura e, paralelamente, aumentar o caudal a tratamento biolóxico. Tamén insta a realizar as modificacións precisas no bombeo de recirculación interna para poder instalar bombas con capacidade suficiente, así como valorar a posibilidade de realizar modificacións na aireación que permitan unha mellor regulación do aire no reactor biolóxico.
PREGUNTAS. O portavoz do PP, Antonio Ameijide, anunciou este martes que presentarán ao goberno local varias preguntas sobre a xestión desta planta e que pedirán que se dea á empresa que a xestiona as instrucións propostas por Augas de Galicia para paliar as deficiencias detectadas.
Ameijide considera ademais que é "alarmante" o incumprimento das esixencias da autorización de vertedura e engade que "non estamos ante un erro puntual, son erros que se repiten ao longo do tempo e o equipo de goberno non toma cartas no asunto para pór coto a estes incumprimentos", afirmou.
O portavoz popular explica que os informes negativos sobre a Edar non son algo novo no Concello de Lugo, "tal e como se confirma no informe". Neste sentido, Ameijide explicou que Augas de Galicia fala de incumprimentos "reiterados" como "a ausencia de solución aos problemas xa coñecidos desde hai tempo, como o escaso caudal das bombas de recirculación interna ou as dificultades para o control da aireación". Para Amejide, a "despreocupación dos socialistas é tal" con respecto á planta depuradora que "levan sete anos co contrato caducado e sen facer nada por regularizar a situación".
O portavoz popular laméntase ademais que o deficiente funcionamento da Edar de Lugo supón un risco para a saúde dos cidadáns, así como para o medio ambiente.
A planta depuradora de Lugo, inaugurada en 2011, tivo un custo de 44,5 millóns de euros e está preparada para recibir 4.300 litros de augas residuais por segundo, fronte aos 600 que admitía a vella planta.
