A Audiencia Provincial de Lugo impuxo penas de tres anos de prisión a un matrimonio acusado de traficar con heroína na capital lucense. A Policía Nacional observou unha transacción e interceptou ao comprador, que levaba encima cinco papelinas de droga. Con todo, na vista oral, o acusado, de 40 anos, e a súa esposa, de 34, negaron os feitos e dixeron que se atoparon por casualidade cun coñecido cando saían do dentista e que se pararon a charlar con el.
A parella recoñeceu que se estiveron pasando un billete entre eles, pero afirmaron que foi "de broma", xa que era un billete "novo, que acababa de saír, e parecía do Monopoly", dixeron. O Tribunal, con todo, conclúe que hai probas suficientes para condenalos como autores dun delito de tráfico ilícito de sustancias estupefacientes das que causan grave dano á saúde.
O comprador afirmou que a parella lle vendeu a droga e despois cambiou a súa versión. Dixo que o ían "a matar" e desmaiouse en comisaría
A Sala considera probado que o 9 de setembro de 2014, sobre as seis e media da tarde, a parella reuniuse co comprador na Rúa Divina Pastora, logo de quedar con el a través de Whatsapp. Os tres desprazáronse xuntos ata a rúa Yáñez Rebolo e, unha vez alí, os acusados entregáronlle ao home cinco papelinas de heroína a cambio de 40 euros. Unha patrulla policial observou o intercambio e interceptou ao comprador.
AMEAZAS. Este home dixo no xuízo que lle comprou a droga a outras persoas que non quería identificar, pero non aos acusados. Con todo, os policías explicaron que inicialmente recoñeceu que lle comprou a heroína ao matrimonio, aínda que posteriormente acudiu a comisaría para dicir que quería cambiar a súa declaración. "Chegou moi, moi nervioso, dicindo que quería cambiala porque senón íano a matar. Incluso caeu e empezou a convulsionar, polo que tivemos que chamar ao 061", contaron.
O Tribunal lucense considera que a versión dos axentes da Policía Nacional non arroxa lugar a dúbidas e condena aos acusados a sendas penas de tres anos de cárcere, así como a pagar multas de 120 euros.
