Os atletas Óscar Domínguez, Enrique Teo e Fernando Ibarra correrán vinte e catro horas pola muralla para concienciar sobre o cancro e apoiar á asociación Somos Unidos polo Cancro.
A segunda edición do desafío "No Cancro Todos Somos Resistentes" arrincará este sábado, ás 11.00 horas, na Praza de Pío XII e o reto dos atletas é superar as 67 voltas en 24 horas que marcaron a edición do ano pasado. A idea é que, día e noite, haxa lucenses que se somen a correr pola muralla cos protagonistas do desafío.
Quen queiran contribuír á causa poderán adquirir, por un euro, un pin e sumarse a correr con Domínguez, Teo e Ibarra.
O ano pasado, recordou a asociación, os atletas estiveron acompañados case continuamente e só deron unha volta sos, o que probou o apoio á loita contra o cancro.
A cita pecharase o domingo, ás 11.00 horas na Praza Maior, cun flashmoob de Star Dance, ao ritmo do himno Puedo, creado por David Taboada para Somos Unidos polo Cancro.
