Atacar ao seu veciño en plena discusión por uns lindes custoulle a un home unha multa de 300 euros. O xuíz obrígalle ademais a indemnizar ao ferido na cantidade de 150 euros polas lesións que lle ocasionou.
Segundo se lle recolle na sentenza, sobre as cinco e cuarto da tarde do 18 de febreiro de 2017, o denunciante e a súa esposa estaban nunha leira da súa propiedade –que limita coa do acusado– en compañía dun perito, xa que querían fixar os marcos. O matrimonio foi a chamar ao seu veciño para que estivese presente na dilixencia pericial, pero o home tomoullo a mal e ameazounos.
O acusado colleu unha pinza e díxolle ao seu veciño: "Voute matar agora mesmo, e se non o fago agora fareino pola noite, que todos os gatos son pardos". Acto seguido, intentou atacarlle co apeiro, pero o veciño esquivou o golpe. Nese momento, o home caeu ao chan e o acusado propinoulle varias patadas por todo o corpo. A vítima tivo que recibir asistencia médica e tardou doce días en reporse dos golpes.
O agresor foi detido e acusado dun delito leve de lesións e outro delito leve de ameazas, polos que foi condenado a sendas multas de 150 euros. O home recorreu a sentenza, pero a Audiencia Provincial de Lugo confirmouna, polo que xa é firme.
