O Presidente da Deputación de Lugo, José Tomé Roca, e a presidenta da Asociación de Autónomas de Lugo, Marta López Yáñez, presentaron este venres no Pazo de San Marcos unha campaña con actividades que lanza o colectivo empresarial para conmemorar o seu décimo quinto aniversario grazas á colaboración do organismo provincial e que están dirixidas á visibilizar o pequeno comercio e incentivar as vendas neste Nadal.
A campaña desenvolverase desde o luns ata o vindeiro venres deste mes e participarán preto dun centenar de tendas que se coñecerán a través das redes sociais da agrupación de autónomas.
A Deputación colabora coa Asociación de Autónomas nesta campaña que ten varios obxectivos. Un dos principais é incentivar as vendas e activar o consumo local e para iso durante unha semana, personaxes do Nadal animarán as rúas de Lugo e invitarán á cidadanía a coñecer as ofertas do comercio local, baixo a lema "Eu son do pequeno comercio". A este respecto, José Tomé subliñou que «ese pequeno comercio que demostra, día a día, que é capaz de grandes cousas. Pequenos poden ser vos locais ou vos negocios, pero é grande a súa calidade, atención, profesionalidade, responsabilidade e compromiso», indicou o presidente provincial.
FELICITACIÓN. O presidente da Deputación arrincou a súa intervención felicitando á agrupación, porque "cando unha asociación cumpre quince anos de existencia, é proba do seu bo facer e da súa utilidade", subliñou.
Ademais, José Tomé puxo de manifesto o traballo desta asociación para contribuír ao desenvolvemento socioeconómico de Lugo e o seu labor en favor da "visibilización do emprendemento feminino".
