As aseguradoras adiantarán fondos para recuperar a actividade industrial

Os danos que deixa o incendio do Ceao sumarán moitos millóns, pero tardarase en cuantificar o impacto económico da catástrofe. Por diante quedan moitas peritaxes e longas batallas para dirimir responsabilidades. Pero o primeiro é salvar as empresas tras o dano sufrido. 

Os representantes das principais compañías aseguradoras das empresas afectadas estiveron este domingo no polígono e algúns xa aseguraron que o diñeiro chegará de forma inmediata para garantir que as empresas poidan seguir funcionando. 

Marisa Pájaro, da compañía Allianz Lucusgal, aseguraba que os empresarios cobrarán e que se lles facilitarán as cousas para que poidan reiniciar a actividade de forma inmediata. 

Os peritos empezan este luns a traballar para avaliar os danos que causou o lume

A Francisco Dorado, por exemplo, dicíalle que busque xa unha nave, que o diñeiro vai chegar. O problema pode ser, máis que a liquidez, a dispoñibilidade de naves que se axusten ás necesidades das empresas afectadas. 

Os peritos das aseguradoras estarán este luns traballando no polígono e darase a eses informes toda a prioridade que sexa necesaria. Non se van a escatimar esforzos, dicía Pájaro. 

Pero o afán por axudar os clientes a seguir adiante non evita que por diante quede un longo proceso ata que se determinen as responsabilidades pola catástrofe económica vivida. 

O primeiro paso antes de fixar responsabilidades é esperar o informe dos bombeiros sobre o ocorrido no polígono industrial

Primeiro haberá que esperar ás conclusións sobre os motivos do incendio. Serán os informes dos bombeiros os que deberán establecer onde e como se iniciou o lume. E despois haberá que avaliar tamén a resposta ante o lume. 

"Hai que establecer a responsabilidade civil", sinalaba Pájaro, que recoñecía que ese proceso quizais non sexa rápido, xa que implica que o seguro do responsable de todos os danos se faga cargo de todos os custos e resarza o resto de aseguradoras do diñeiro que xa adianten. 

Algúns dos empresarios máis afectados, en tanto, dicían que teñen actualizadas as pólizas e confiaban en que chegue xa o diñeiro para recuperar a actividade.