O ascensor do Sagrado Corazón comezou a funcionar en probas. Trátase do terceiro elevador público que hai na capital lucense e que pretende como os demais -o da muralla, situado detrás da Deputación, e o das Fontiñas- facilitar a accesibilidade a lugares e zonas da cidade máis altas. En concreto, no Sacro Corazón hai unha altura de máis de dez metros.
A posta en servizo, moi esperada no barrio, non ten data, pero velo en funcionamento xerou onte expectativas. O Concello chegou a ameazar hai meses con penalizar á empresa construtora, a ourensá Alea, pola demora na construción e, tras esa advertencia, os traballos aceleráronse. Estes traballos foron adxudicados en abril, cun prazo de catro meses, e no verán, a empresa pediu unha prórroga de mes e medio. Concedéuselle só a metade de tempo, pero tamén así excedeu o prazo.
O atraso da obra afectou os veciños do polígono e aos usuarios dos servizos que hai nesta zona -máis elevada que a avenida de Adolfo Suárez- como son o colexio, a igrexa, o centro médico e o centro social. Ao estar pechada a escalinata durante meses, os cidadáns tiñan que dar un rodeo considerable ou ben subir por Burozos por unha rúa que ten unha elevada pendente.
Tanto o proxecto deste ascensor como o das Fontiñas foron desbloqueados no anterior mandato, tras ser concibidos fai máis dunha década.
As obras comezaron coa derriba da escaleira na que se sitúa o armazón. O ascensor ten formato panorámico, posibilitando así as vistas desde o interior. O sistema de embarque realízase pola porta sur, mentres que o desembarque realizarase polo norte, na parada segunda e na terceira, ao nivel da praza da igrexa e á beira do colexio.
A comunicación entre ambos os desembarcos superiores realizarase a través de sendas pasarelas: unha primeira chegando á praza salvando un espazo de cinco metros e outra que salva unha distancia de dezaseis metros, mediante a construción dunha viga-ponte con estrutura metálica.