A empresa ourensá Construcións Alea comprometeuse a finalizar a instalación do ascensor do Sagrado Corazón na primeira quincena de outubro, segundo informou a socialista Ana Abelleira, responsable de accesibilidade no Concello.
Este é o último prazo ao que se comprometeu a empresa, que por circunstancias que non chegaron a transcender, acumula un considerable atraso na obra. Esta foi adxudicada en abril, cun prazo de catro meses, e no verán, coincidindo cunha retardación dos traballos, pediu unha prórroga de mes e medio. Concedéuselle a metade, pero tamén excedeu este prazo, polo que o goberno local confirmou que lle será aplicada unha penalización económica.
O goberno local confía en que a empresa cumpra o último prazo ao que se comprometeu, porque o atraso da obra ocasiona un gran prexuízo aos veciños da parte alta do barrio e aos usuarios dos servizos que hai nesta, como o colexio, a igrexa, o centro médico e o centro social. Ao estar pechada a escalinata, os cidadáns teñen que dar un rodeo considerable.
Desde o verán, o goberno local leva realizando xestións privadas con Alea para intentar que acelerase os traballos e tamén lle fixo algún apercibimiento público. Nos últimos días, a obra colleu máis ritmo, segundo asegura o goberno.
Este recordou que ese ascensor, como o inaugurado nas Fontiñas primavera, foron apostas da alcaldesa, Lara Méndez, por mellorar a accesibilidade destes barrios. No anterior mandato desbloqueáronse ambos os proxectos, que comezaron a xestarse en anteriores gobernos socialistas, hai máis dunha década.
A obra do Sagrado Corazón está a ser supervisada polo enxeñeiro xefe do Concello, adscrito á concellaría de infraestruturas, agora en mans do BNG. Con todo, ao tratarse dunha obra de accesibilidade, a dirección política está a ser levada a cabo polos socialistas.
