O ascensor público de Fontiñas xa tivo a súa primeira avaría en menos dun mes de funcionamento e que deixou atrapada este luns durante varios minutos unha veciña da zona.
O incidente produciuse a media tarde cando a muller se dispuña a utilizar o elevador e, de súpeto, o aparello deixou de funcionar sen que a usuaria puidese facer máis nada que usar o botón de urxencia que teñen todos os ascensores para alertar de que deixara de funcionar.
Pasados uns "cinco ou seis minutos", segundo informan o goberno local, un operario da empresa que realiza o mantemento do elevador acudiu ao lugar e iniciou o procedemento de apertura da porta do aparello para que puidese saír a veciña.
Á zona tamén se desprazou unha patrulla da Policía Local para supervisar a manobra de apertura do elevador e comprobar que a muller se atopaba ben.
A falta de que elabore un informe técnico para coñecer as causas desta avaría, as fontes consultadas explican que o bloqueo da porta puido deberse a que algunha pedra se coou no mecanismo do ascensor, o que provocaría o seu peche automático.
MOITOS USUARIOS. Desde que foi posto en funcionamento polo Concello a mediados do mes pasado, o elevador público de Fontiñas é usado a diario por centos de veciños, xa que serve para salvar os 60 chanzos das escaleiras que separan a avenida da Rúa Primavera. O ascensor, que ten capacidade para oito persoas, cun peso máximo de 630 quilos, salva os 15 metros de altura que hai entre as dúas rúas en só 26 segundos.
Moitos usuarios mostraron a súa satisfacción por esta obra, aínda que xa hai queixas de falta de limpeza no interior.
