"Somos estudantes, pero tamén artistas". Marta Fernández é unha das vinte alumnas de bacharelato da modalidade de Artes do instituto Sanxillao de Lugo, que expón algunhas das súas obras na mostra inaugurada onte no novo local da asociación cultural A Hedreira, sito na Rúa Catasol.
Con esta exposición, que permanecerá aberta ata o día 31 deste mes en horario de 17.00 a 21.00 horas, de luns a domingo, pretenden, segundo explica outra das alumnas, Irea Cendán, "visibilizar que estamos a facer cousas chulas e comezar así a dedicarnos ao que nos apaixona".
Irea Cendán e Marta Fernández, que teñen en común a súa idade, 17 anos, e a súa paixón pola fotografía, puxéronse ao choio para organizar esta mostra case nada máis iniciar este curso 1º de Bac de Artes no IES Sanxillao. á súa proposta sumáronse compañeiros de estudos e profesores, que incluso financiaron o custo dos carteis para anunciar a mostra.
"Coa de artistas que temos no noso instituto, ¿por que non iamos facer unha exposición?", afirma Irea Cendán, que cando conclúa o Bac gustaríalle realizar un curso específico de fotografía nunha escola superior de arte e deseño como a Ramón Falcón de Lugo ou nun centro de FP.
A mostra inaugurada este martes consta de obras de fotografía, debuxo dixital, deseño de moda ou pintura ao óleo, entre outras actividades artísticas.
Ademais, os estudantes realizaron unha performance de baile e música, espectáculo que teñen previsto repetir en varias ocasións ao longo deste mes.
Pretenden dar visibilidade ás súas obras, algunhas das cales se poden adquirir, e tamén aos seus estudos.
"é un bacharelato que moita xente ten aínda mal visto. Queremos que vexan o que facemos. Queremos animar aos estudantes a que o cursen e a que exploten a súa arte", di Marta Fernández, a quen unha vez concluído o bacharelato gustaríalle estudar Belas Artes.
Bautismo dobre. Esta exposición é a posta de longo para a maioría dos vinte alumnos do instituto Sanxillao que participan nela e tamén o é para a novel asociación cultural A Hedreira, que pretende organizar todo tipo de actividades artísticas na súa sede da Rúa Catasol.
A Hedreira reconverteu en local social o que antes era unha tenda de mobles de segunda man.
Marta Fernández destaca que a organización desta mostra tamén puxo de manifesto que "aos artistas que estamos a empezar tampouco nos dan moitas facilidades". Lamentaba así que lles pecharon portas ás que chamaron para poder realizar esta exposición.
