Comeza este venres o ciclo de visitas guiadas para coñecer o novo parque urbano de As Gándaras que organiza o Concello de Lugo. As xornadas de portas abertas realizaranse todas as semanas, de venres a domingo, durante os meses de agosto e setembro. A visita deste venres terá tres quendas: dous pases pola mañá, un ás 10.00 horas e outro ás 11,30 horas, e un pase pola tarde, que terá lugar ás 17.00 horas. As visitas matinais terán unha duración dunha hora e a visita da tarde estenderase ao longo de dúas horas. O aforamento máximo é de vinte persoas por sesión.
A entrada é gratuíta pero é necesario inscribirse previamente para participar na visita enviando un correo a lifealcaldia@ lugo.gal.
Taller aprazado. O taller infantil previsto para este sábado celebrarase o domingo pola previsión de mal tempo prevista para o sábado. A actividade dirixida aos máis pequenos realizarase en dúas quendas, un pola mañá ás 11.00 horas e outro pola tarde a partir das 18.00 horas. O taller incluirá un contacontos e unha visita guiada polo bosque.
Aqueles que queiran explorar libremente esta nova zona verde da cidade, situada na contorna do polígono das Gándaras, poderán facelo de venres a domingo, desde as 9.30 horas ata as 19.30 horas, horario en que polo momento o complexo permanecerá aberto ao público.
O bosque urbano contará cunha gran diversidade de flora ao albergar máis de 15.000 especias distintas e oito cultivos enerxéticos, que son plantacións de baixo custo e mantemento dedicadas á produción de enerxía. Inclúe, de igual forma, oito zonas arboredos con máis de cincuenta especies distintas de árbores autóctonas. A localización elixida para este novo pulmón urbano non é casualidade, sitúase entre os dous grandes parques industriais como son O Ceao e As Gándaras.
A creación deste complexo natural encádrase na estratexia Life Lugo+Dinámico, que pretende contribuír a facer de Lugo unha cidade innovadora no deseño de cidades sostibles que teñen como obxectivo común crear barrios libres de emisións de carbono. Este novo parque está previsto que sexa aberto definitivamente ao público o próximo verán. O proxecto xorde da colaboración entre o Concello lucense, o Campus Terra da USC e a Universidade Politécnica de Madrid.
