O xulgado de instrución número 1 de Lugo, primeiro, e a Audiencia Provincial, despois, arquivaron a causa que pesaba sobre unha veciña da capital lucense, que estaba acusada de secuestrar á súa neta, de 11 meses. A nai da menor, que se separou do seu marido, foi quen presentou a denuncia contra a súa exsogra.
Os feitos que orixinaron este procedemento tiveron lugar en marzo do ano pasado. A denunciante asegurou que, cando se ían a desprazar coa menor desde Lugo unha consulta médica na Coruña, a súa sogra obrigoulle a baixarse do turismo e que levou ao bebé.
O xulgado arquivou a causa, decisión que ratificaría a Audiencia Provincial, porque tanto a sogra, como o marido desta e a nai da denunciante, que a acompañaban nesa viaxe á capital herculina, coincidiron en desmentir tal acusación.
Engade o auto xudicial que a avoa acompañou ao bebé á consulta médica co consentimento do pai e que "non hai indicios suficientes" de que lla levase contra a súa vontade e "menos aínda utilizando a violencia" como sostiña a denunciante.
Destaca ademais que a moza, tres meses antes da denuncia, deixara ao bebé a cargo dos seus avós paternos pola "súa propia incapacidade para coidala", debido a que a menor tiña unha doenza renal que se agravou polas infeccións que tivo" mentres estivo con ela.
O auto xudicial aclara tamén que a nai "non tiña a custodia exclusiva" da nena. Esa situación aínda se está determinando hoxe en día en vía civil.
Por todos estes motivos, o xulgado considera que a acusada non puido cometer un delito de subtracción de menores, nin de coaccións, o que foi ratificado posteriormente pola Audiencia Provincial. Tanto a Fiscalía como o servizo de familia da Xunta de Galicia son coñecedores desta situación.
