"Segue a ser o neno impertinente da clase. Teña un pouco de educación". O reproche da alcaldesa, Lara Méndez, ao viceportavoz do PP, Antonio Ameijide, que o recibiu como unha medalla, deixaba claro no primeiro pleno do novo curso político que por moitas novidades que houbese, algunhas cousas non van cambiar. E que eses costumes que se manteñen non son precisamente as mellores, e máis tendo en conta que a maior parte dos puntos máis importantes se aprobaron por unanimidade.
O primeiro pleno ordinario do novo mandato serviu, por exemplo, para que debutasen no debate do día os responsables de economía e urbanismo do goberno, Paula Alvarellos e Miguel Couto, ou o concelleiro de Cidadáns Juan Vidal-Pardo. Tamén para darlle forma física á nova correlación de forzas, co nacionalista Rubén Arroxo á dereita de Lara Méndez e sendo interpelado directamente como o tenente de alcalde que é.
Ambos, Méndez e Arroxo, PSdeG e BNG, trataron de mostrar unha unidade de acción que tanto PP como Cidadáns van pór a proba constantemente. O luns, á primeira ocasión, fixérono cabalgando sobre dúas mocións dos populares, unha sobre O Garañón e outra sobre a contratación de Def con Dos para o San Froilán.
O debate sobre o mamotreto das costas do Parque é unha desas cousas que non van cambiar, en opinión de Antonio Ameijide, porque a alcaldesa limítase neste asunto a protexer "ao seu padriño político", tratando de matar deste xeito tres paxaros dun tiro: Lara Méndez, o exconcejal de urbanismo José Ramón Gómez Besteiro e Álvaro Santos, que pasaba por alí.
Tanto o concelleiro do PP como Cidadáns trataron de picar neste punto a Rubén Arroxo, recordándolle un pasado infestado de críticas pola actuación do goberno co Garañón. Pero o nacionalista non se deu por aludido e os seus concelleiros votaron xunto aos seus socios para rexeitar unha moción que, doutra banda, tampouco parecía ter outra función que sinalar supostas contradicións internas porque só pedía seguir buscando unha solución .
CONCERTO. Algo similar, pero cos papeis cambiados, sucedeu coa contratación do grupo Def con Dos para as festas de San Froilán, anunciado pola concelleira nacionalista Maite Ferreiro como un acto en defensa da liberdade de expresión poucos días despois de que PP, Cs e Vox anulasen en Madrid un concerto do grupo de César Strawberry.
O autor de Armas pal pueblo fora condenado polo Tribunal Supremo por enaltecemento do terrorismo e menosprezo ás vítimas, polo que tanto os laranxas como os populares acusaron o goberno de politizar as festas e malversar o diñeiro público. Ramón Carballo, aproveitando, instou a Lara Méndez a que se retratase respecto diso, aínda que esta non puido ouvilo porque se ausentou do pleno xusto no momento en que se comezaba a debater esta moción.
Regresou, iso si, a tempo para votar en contra e para escoitar os argumentos de Ferreiro, que incluíron referencias aos ventres de aluguer, ás guerras de África, aos mortos no Mediterráneo e a acosadores sexuais en Lugo. Logo quixo dicir algo sobre a contratación do grupo e o San Froilán, "pero xa non digo nada porque non me queda tempo", lamentouse.
