O alcalde de Castroverde e candidato á Secretaría Xeral do PSdeG na provincia de Lugo, José María Arias, arremeteu duramente contra o presidente da xestora que se fixo coas rendas do partido tras a renuncia de Álvaro Santos, o secretario de Organización José Antonio Quiroga, pola "súa marrullería" e falta de "neutralidade" neste proceso.
En declaracións a Efe, Arias asegurou que está "un pouco encabuxado" por todo o que está a suceder neste proceso para elixir ao novo secretario xeral do PSdeG, dado que, segundo o seu criterio, é o propio Quiroga quen “tutela” á outra candidata, a deputada autonómica Patricia Otero, de modo que non está a exercer "a arbitraxe" que lle correspondería "con neutralidade".
Arias: "Teño probas, porque os compañeiros chámanme para avisarme"
Desde o seu punto de vista, o que está a suceder é algo "inédito", porque "este señor, que tería que ser neutral", está incluso "intentando comprar" ás "agrupacións pequenas" coa promesa "de cargos na Deputación", tanto de asesores, "como de libre designación ou como cargos de confianza".
"É unha marrullería", lamentou Arias, "e teño probas, porque os compañeiros chámanme para avisarme".
"Gustaríame presumir dun partido con elegancia e con limpeza", engadiu o alcalde de Castroverde, pero o que está a suceder "é triste e lamentable".
