A organización do Arde Lucus, festa de recreación histórica que obtivo o selo do Ano Europeo da Cultura, pechouse cun superávit de 53.044 euros, segundo as contas que deu a coñecer este luns o goberno local aos grupos da oposición.
Os ingresos ascenderon a 442.513,28 euros, dos que o Concello de Lugo achegou 300.000; a ducia de empresas patrocinadoras, 47.500; a Xunta, 25.000, e a Deputación Provincial, 18.000. Ademais, fíxose caixa co mercado (macellum), 26.702,96 euros; as tabernas, 12.417,20, e os postos de comida, 2.351,12. A venda de entradas polos tres espectáculos de pago (Circo, Harpastvm e Divinivm) reportou 10.542 euros.
Os gastos foron 389.469 euros, dos que os espectáculos supuxeron 107.742,80 euros; as asociacións de recreación histórica, 93.600; a cartelería e programas, 79.228,59 euros; produción, 58.596,60; seguridade, 18.236,98; aloxamentos, 15.863; electricidade, 14.502, e o teatro, 11.700 euros.
CONSELLO. Ao seu poder de convocatoria e ás súas contas saneadas, súmase tamén que a guía que elabora a compañía de aluguer de coches Hertz considera o Arde Lucus como unha das 20 festas mellores festas que se celebran no verán en España, polo que aconsella aos turistas non perdela.
Neste ranking nacional só aparece outra celebración galega entre as 20 primeiras, a Romaría Viquinga de Catoira.
