O Arde Lucus Covid-XIX bota a andar este xoves na que será unha edición totalmente atípica da festa de recreación romana lucense. Tanto, que de momento nin sequera se sabe se haberá desfiles de tropas, xa que a decisión está pendente da reunión que esta tarde manterán os representantes das asociacións de recreación histórica que solicitaron os permisos coa subdelegada do Goberno, Isabel Rodríguez.
De concederse o permiso para eses desfiles, tampouco serían como os afeitos nas 18 edicións anteriores. En principio, expuxéronse catro por parte de tres asociacións, un para o venres, dous para o sábado e outro para o domingo. En cada un participaría un número limitado de efectivos, gardando as distancias de seguridade, sen portar escudos nin armas para non ter que depositalos en ningún sitio, sen paradas, con máscaras e evitando no seu percorrido cales sen suficiente ancho. Fálase incluso de non facilitar ao público o percorrido, senón só o punto de partida e o de chegada, para evitar que se concentre nas rúas ao paso dos desfiles.
Se finalmente se autorizan estes actos, serían dos poucos presenciais nun Arde Lucus fundamentalmente virtual. O programa deseñado polo Concello só inclúe seis actos na rúa, o primeiro deles esta mesma noite, ás 22.15 horas: o aceso dunha chama (esta virtual, iso si) na torre do reloxo da casa consistorial.
Venres, sábado e domingo, ás 23.00 horas, proxectarase un vídeo na Mosqueira, e o sábado e o domingo pola tarde haberá vodas celtas en Porta Miñá, nas que se poderá participar con cita previa (chamando ao 633680550).
PROGRAMACIÓN VIRTUAL. Iso é todo, o resto da programación é virtual e o Arde Lucus quedará confinado na web www.ardelucus.com, onde se poderá seguir a festa a través de vídeos e incluso participar nela a través das redes sociais. A cita coa festa romana na rede comeza esta tarde, ás 18.00 horas, con A fundación da cidade por parte do Senatus Lucus Augusti. Unha hora despois, Habelas Hailas danzará o seu baile do solsticio e ás 20.00 Pax Romana recreará a Antiga normalidade.
Tir Na Gog, ás 21.00 horas, subirá á web a súa Zythos castrexo, unha hora antes de que as Vestales de Lucus Augusti acendan o lume sacro. A primeira xornada virtual do XIX Arde Lucus pecharaa Achádego teatro, coa peza Xustiza, a xusta.