O fiscal solicitou tres anos de prisión para un mozo lucense que lle asestou catro coiteladas a un coñecido ao que intentou roubar o diñeiro que levan encima.
No xuízo celebrado este xoves na Audiencia Provincial de Lugo o acusado dixo que "non recordaba" o sucedido porque ese día fumara porros e tomado pastillas, pero que "si sabía" que o acoitelou.
Os feitos tiveron lugar no parque empresarial das Gándaras de Lugo en marzo do ano pasado, antes de que se decretase o estado de alarma.
O fiscal, que dixo que a vítima falecería se non chega a ser atendida urxentemente debido á gravidade das feridas que presentaba, rebaixou á metade a súa petición inicial de seis anos de prisión por un delito de homicidio en grao de tentativa ao aplicar a eximente incompleta de que o acusado sofre trastorno por déficit de atención e porque xa consignou 6.000 euros para indemnizar á vítima. Os letrados da defensa e da acusación particular adheríronse a esa solicitude do ministerio público.
A vítima protagonizara tres meses antes un incidente de seguridade viaria cando estivo a piques de atropelar ao capitán da Garda Civil de Tráfico nun macrocontrol establecido por axentes deste corpo e da Policía Local na Avenida da Coruña da capital lucense na mañá de Ano Novo.
Entón fuxiuse e foi detido minutos máis tarde cando estaba a tomar unha consumición na barra dun after da zona de Fonte dos Ranchos. Deu positivo en drogas e alcol.
