O xulgado do Penal número 1 de Lugo aprazou o xuízo contra un home que se enfronta a catro anos de prisión por asaltar presuntamente a outro a punta de navalla e arrincarlle do pescozo unha cadea de ouro.
Tal e como se recolle no escrito de acusación do fiscal, o roubo produciuse o 7 de setembro de 2015, a media mañá, no aparcadoiro do hipermercado sito en Montero Ríos.
O acusado esixiulle á vítima que lle entregase a cadea de ouro. Esta negouse e o asaltante sacou unha navalla, púxolla ao pescozo e pediulle de novo a xoia. Os dous homes forcexaron e caeron ao chan, momento que o acusado aproveitou para arrincarlla e fuxir.
A vítima, segundo a versión do ministerio público, sufriu erosións nunha man e no pescozo, así como unha contusión de cadeira, polo que precisou asistencia médica. O fiscal acusa o agresor dun delito de roubo con violencia.