Unha veciña da parroquia lucense de Soñar, de 74 anos de idade, apareceu morta á primeira hora da mañá deste xoves na estrada que discorre por diante do seu domicilio, a poucos metros da súa vivenda. O corpo da septuaxenaria non presentaba signos de violencia, polo que -á espera de que se coñezan os resultados da autopsia- todo apunta a que a muller faleceu por causas naturais.
A voz de alarma deuna o condutor dun vehículo agrícola que pasou polo lugar, pouco antes das oito e media da mañá, e viu a unha muller tombada no chan, ao carón da calzada, case pegada a unha vivenda. O home apeouse e comprobou que a muller non se movía nin respondía ás súas preguntas, polo que chamou á Policía Local. Os axentes acudiron de inmediato ao lugar e solicitaron ao mesmo tempo a asistencia dunha ambulancia medicalizada do 061, coa esperanza de que a anciá estivese con vida. Con todo, os sanitarios xa soamente puideron certificar o óbito da muller.
INVESTIGACIÓN. O corpo sen vida da anciá apareceu a tan só cincuenta metros do seu domicilio. A septuaxenaria vivía soa no inmoble número 4 da parroquia de Soñar e o cadáver foi localizado diante da casa dos seus veciños do número 5, a tan só cincuenta metros da súa.
A Brigada Científica da Policía Nacional tamén acudiu ao lugar e abriu unha investigación para determinar as causas da morte. A hipótese principal que barallan os investigadores é que a septuaxenaria se atopase indisposta de forma repentina e saíse da súa vivenda coa intención de pedir axuda aos seus veciños. Ao parecer, á muller non tiña teléfono e levaba un papel cun número apuntado, polo que a Policía cre que se dirixía a casa dos seus veciños para pedirlles que chamasen a ese número, pero non conseguiu chegar.
