Non hai un acordo formalmente pechado, e moito menos por escrito, pero a solución para que tanto a Anexa como Formación de Profesorado teñan pavillón está canalizada e xa se dá por feito que pasa por recuperar o acordo de 2011 e que os alumnos da USC teñan o uso preferente do pavillón do Politécnico.
O anpa da Anexa xa comunicou ás familias que suspende todas as mobilizacións, polo menos durante o verán, dado o avance das negociacións co delegado da Xunta, Javier Arias.
Esta semana haberá novas reunións para pechar a solución definitiva ao conflito, pero na USC tamén contan xa con recuperar o uso preferente da instalación deportiva do Politécnico, que se lles outorgou en 2011 a cambio de que deixasen o seu pavillón á Anexa.
A USC sostén que aquel acordo rompeuno de forma unilateral a Xunta, razón pola que decidira volver recuperar para os seus alumnos o seu pavillón.
Pero o pacto que se está ultimando agora permitiría dar satisfacción a todas as partes, xa que todos os alumnos terían acceso a instalacións deportivas que precisan.
A fórmula do acordo suporía tamén parar as obras previstas no pavillón da Anexa, onde en principio xa só faríanse uns baños.
