Tres mulleres polacas coincidiron esta semana no quirófano do hospital veterinario HA, na Rúa Virxe da Esperanza 31, no barrio de Montirón. Esta casualidade ocorreu porque unha das empregadas do hospital é polaca e porque este verán dous novos estudantes polacas fixeron as súas prácticas dentro do programa Erasmus+ nesta clínica lucense.
Kasia Busłowska e Weronika Stokłosa estudan Veterinaria na Universidade de Varmia e Masuria na localidade polaca de Olsztyn. Kasia explicou que decidiu facer as súas prácticas en España, porque "estivera vivindo en Córdoba durante un ano e encantoume o país" e que o que a levou a elixir Lugo e o hospital HA foi a información que atopou sobre el nas redes sociais. Ademais, "unha amiga miña polaca está a estudar aquí en Lugo na facultade de veterinaria, foi ela quen me dixo que Lugo era xenial e que Galicia era moi bonita", explica Kasia Busłowska.
O clima é unha das cousas que máis lles sorprendeu, "é moito máis parecido ao de Polonia do que me esperaba" di Weronika. Kasia explica que "en Polonia temos unha idea diferente de como é España, sempre o asociamos ás praias e á calor". Doutra banda, definen aos galegos como "amables e agradables".
As mozas cren que facer prácticas neste hospital foi unha gran oportunidade porque
"todo está moi novo e hai moitos aparellos e materiais que a maioría de hospitais non teñen", destaca Kasia.
Weronika Stokłosa, Ángel Romasanta e Kasia Busłowska, no hospital HA. AIDA SOENGAS
Weronika explica que o que máis lle gustou de traballar na clínica de Lugo foi "que se poida levar a cabo todo o proceso médico nun só lugar, é dicir, desde o diagnóstico ata que se lle dá o alta, sempre hai alguén pendente do animal enfermo".
Ángel Romasanta
As estudantes cren que o ambiente de traballo nesta clínica foi moi enriquecedor, xa que todos comparten o que saben cos demais e trabállase sempre en equipo, algo que é menos habitual nas clínicas de Polonia.
