A Asociación Amigos do Camiño de Santiago na Provincia de Lugo prevé percorrer durante o Ano Santo 2021 tres das históricas rutas a Compostela. Segundo avanzou o seu presidente Ángel Trabada nunha comunicación dirixida aos socios, dado que pola pandemia decidiuse non celebrar asemblea, o colectivo iniciará o 14 de febreiro a primeira das sete etapas que unen O Cebreiro con Santiago de Compostela.
A continuación, os integrantes da asociación completarán as catro etapas do Camiño de Fisterra, mentres que tamén está previsto retomar dúas actividades aprazadas no seu calendario de 2020: o percorrido entre marzo e abril dos tramos pendentes do Camiño Portugués entre O Porto e Ponte da Lima, dando continuidade así a unha acción desenvolvida en 2018, e tamén a viaxe cultural a Sicilia, entre o 18 e o 25 de setembro.
A asociación continuará en 2021 co seu apoio aos empresarios cuxa actividade vira ao redor das rutas xacobeas en Lugo.
