A CEO do Grupo Lence, Carmen Lence
Estes convenios, segundo indicaron os asinantes, pon de manifesto o compromiso deste grupo empresarial coa formación dos lucenses e permitirán que alumnos da Uned de Lugo non teñan que desprazarse a outros centros limítrofes para realizar prácticas obrigatorias de laboratorio, que pasarán a desenvolverse nas dependencias da factoría Ceao 2. Tamén permitirán a estudantes doutras titulacións levar a cabo prácticas curriculares e extracurriculares na sede do grupo empresarial.
Segundo declarou Carmen Lence, "a colaboración é un dos valores do grupo. Colaboramos cos nosos equipos, provedores, clientes e, como non, con institucións como a Uned. Estamos moi orgullosos de achegar as nosas instalacións para a formación de futuros profesionais".
Pola súa banda, Ana Traseira agradeceu a Carmen Lence a súa "sensibilidade e compromiso coa formación universitaria dos lucenses", á vez que resaltou "a importancia deste acordo, posto que este ano será o primeiro que se poida ofertar este servizo ao alumnado".
Neste sentido, a directora da Uned incidiu na importancia de establecer sinerxías co tecido empresarial lucense, "co que a entidade ten un compromiso firme a nivel económico, social e ambiental".
Durante o encontro para asinar o convenio tamén se trataron outros temas, como o proxecto #LugoNaturalMente, que obtivo catro distincións nacionais en materia de sustentabilidade no último ano e que ten tres eixos principais de actuación: a loita contra o cambio climático, a posta en valor do patrimonio natural e ambiental da provincia e divulgación e promoción dos Obxectivos de Desenvolvemento Sostible da Axenda 2030 da Onu.
Ambas as entidades manifestáronse moi satisfeitas co acordo e xa están a estudar novas vías de colaboración.
O Grupo Lence ten a súa principal área de actividade na industria de alimentación, comercializando produtos lácteos a través de varias marcas propias, entre elas Leyma e Río de Galicia. Conta con tres plantas de produción e ten nestes momentos un persoal de 165 persoas en Galicia.