A pesar de que era a súa ópera prima, que a maioría do elenco non tiña táboas e que, para rizar o rizo das dificultades, o texto era en alemán, a súa obra triunfou. Unha decena de alumnos de 4º de Eso e 1º de BAC do instituto Nosa Señora dos Ollos Grandes de Lugo, coa súa profesora María Rey como dramaturga e directora de escena, acaban de representar a España en Berlín nunha mostra de teatro, tras impoñerse na fase nacional da rede Pasch, da que forman parte no noso país oito centros docentes nos que se imparte esta lingua centroeuropea.
Na capital xermana compartiron escenario con estudantes de Alemaña, Italia, Malta, Portugal, Bélxica e Francia. Estes representaron a mobilización dos chalecos amarelos, a pesar de que esa é unha cor maldita no teatro.
"Deixamos o listón alto e estamos moi orgullosos", afirma un dos protagonistas, Yago Atadell, que cursa 4º da Eso.
Para alcanzar ese éxito alumnos e profesora ensaiaron durante este curso entre dúas e tres horas todos os martes pola tarde, restándolle tempo aos seus estudos, actividades extraescolares ou lecer. Cando se puxo ao choio María Rey, coa que colaborou a asistente de idioma nativa Mersiha Kalajdzija, cría que "non lograría xuntar no cásting os 10 alumnos requiridos e en cambio quedaron varios fóra".
A súa obra de teatro, titulada Sen redes. Un drama familiar, que incluíu a interpretación dunha canción tradicional alemá e unha coreografía, aborda a falta de comunicación pola adicción a internet, WhastApp, Instagram ou Facebook, que é un mal común que afecta a adultos e novos.
Conta a historia dunha avoa de 86 anos que se marcha de vacacións ao Caribe, onde se namora dun nativo, xa que a súa familia, coa que vive, non lle fai caso cando os invita a celebrar o seu aniversario, nin sequera cando lles ía deixar a herdanza. O seu fillo estaba enganchado ás compras en internet, a súa nora ao traballo online, o seu neto ao WhastApp e a súa neta a xogar en rede ao Fortnite. A falta de comunicación é tal que o primoxénito se decata da viaxe da súa nai por unha veciña á que esta lle enviou unha postal. Cando unha tormenta os desconecta, decátanse do enganchados que están ás redes e cruzan o charco para acompañar á octoxenaria.
Homes e mulleres intercambiaron as adiccións do guión orixinal a proposta da alumna de 4º da Eso Alba Sandar porque consideraba que ese estereotipo inicial era "sexista".
Reparto
Os actores —a maioría non se identifica coa adicción ás redes sociais dos personaxes— son Nerea Porta, María García, Manuel Alonso, Alba López, Víctor González, Sandra López, Yago Atadell, Alba Sandar, Carmen Miragaya e Laura Rigueiro —ambas as ausentes na foto porque tiñan exame—.
