Un altercado nocturno na rúa Mariña Española saldouse con varios feridos e con dúas mulleres detidas. Os axentes trasladáronse ao lugar -sobre as seis da madrugada do martes- despois de que unha persoa chamase ao 091 denunciando que se acababa de producir un roubo con violencia.
Varias patrullas percorreron a rúa e accederon ao interior de diferentes establecementos de hostalería para intentar localizar ao autor do presunto roubo. Segundo explicou o portavoz policial, cando saían dun dos locais, unha muller comezou a increparlles e a recriminarlles a súa actuación, polo que lle pediron que se identificase. A moza negouse a mostrarlles a súa identificación e "continuou coa súa actitude", ata que os axentes optaron por reducila e trasladala a comisaría.
Mentres tanto, a súa amiga achegouse aos policías e gritoulles que a soltasen. A moza increpounos e tamén foi reducida e detida. Finalmente, as dúas mulleres pasaron a noite nos calabozos da Rúa Chantada -acusadas de senllos delitos de atentado contra os axentes da autoridade- e o martes pola tarde foron postas a disposición do xulgado e quedaron en liberdade.
Como consecuencia do altercado, varios axentes resultaron feridos e tiveron que recibir asistencia médica nun centro hospitalario.
DETIDAS. As mulleres, pola súa banda, denunciaron no xulgado, xa que aseguran que os axentes as golpearon e actuaron en todo momento con gran violencia. "Un policía pediulle a documentación á miña amiga de moi malos xeitos e ela simplemente díxolle que lla pedise ben ou non lla entregaba. Entón tirárona sobre o asfalto e dobráronlle os brazos. Eu achegueime para dicirlles que a soltasen e tamén me retorceron os brazos e metéronme no coche coma se fose unha cadela", explica.
Segundo o testemuño da muller, unha vez en comisaría, un dos axentes golpeouna. "Nada máis baixarme do coche, e aínda esposada, o policía agarroume do pescozo e intentoume aforcar. Levantoume polo aire e case me deixa sen respiración. Despois golpeoume na cara con forza e tiroume sobre unha cadeira azul. Nese momento había máis policías mirando, pero ninguén fixo nada. Despois, o axente dixo que eu o mordín, pero iso non é certo en absoluto. O único que fixen foi patear a fiestra do coche patrulla e dicirlles dúas groserías polo mal que me estaban tratando", asegura.
A muller tamén recibiu asistencia médica. "Fixéronme varias placas no Hula e non teño nada roto, pero estou chea de mazaduras e golpes. Cando me levaron a declarar, denuncieino todo ante a xuíza", di.
LESIÓNS. Co seu parte de lesións, unha das mulleres detidas asegura que quere demostrar que os axentes "se excederon" na súa actuación. Os policías, pola súa banda, tamén achegaron ao xulgado os seus partes médicos para esixir as responsabilidades pertinentes se se celebra o xuízo por un delito de atentado aos axentes da autoridade.
