O conselleiro de Sanidade, Jesús Vázquez Almuiña, e a alcaldesa da cidade, Lara Méndez, asinarán este venres -día 21 de setembro- o convenio de colaboración entre a Xunta e o Concello para coordinar o desenvolvemento do primeiro Centro Integral de Saúde que funcionará en Galicia, concretamente no barrio da Residencia de Lugo.
Segundo informou a Xunta de Galicia, trátase dun "novo paso adiante" para facer fronte a este "ambicioso proxecto", co que, ademais de crear novos servizos sanitarios na cidade de Lugo, rehabilitarase e recuperarase o antigo Hospital Materno-Infantil, un dos edificios incluídos no complexo do vello Xeral.
O novo Centro Integral de Saúde, recordou a Xunta de Galicia nun comunicado, "concentrará nun mesmo edificio todos os servizos dunha sanidade pública de primeiro nivel: o servizo de saúde mental, a base do 061, un Punto de Atención Continuada (PAC), un moderno centro de saúde e os novos servizos de fisioterapia, odontoloxía e xinecoloxía".
"A Xunta de Galicia reafirma o seu compromiso de manter os proxectos en marcha para o barrio da Residencia, en Lugo, e avanza que non hai ningún cambio con respecto aos servizos que administración autonómica impulsará nesa zona da cidade", explica a Delegación Territorial.
Ademais do futuro Centro Integral de Saúde, recorda, "o barrio acollerá a futura oficina de emprego e formación, a residencia para persoas maiores, un centro de emprendemento aeronáutico e un servizo común de climatización por biomasa, aos que se sumaría a futura comisaría -provincial do Corpo Nacional de Policía- de manterse o compromiso que respecto diso tiña asumido o anterior Goberno central".
