Bombeiros e Policía Local mobilizáronse este xoves, a media tarde, alertados polos veciños dun inmoble da Rolda da Muralla, que está próximo á Rúa Vilalba. debido a que nos seus domicilios apreciaban un forte cheiro a combustible.
Os bombeiros revisaron a instalación de gas cidade e realizaron outras comprobacións para descartar unha posible fuga nesta subministración, que non se produciu.
A hipótese que cobrou entón forza foi que se rexistrou algunha filtración de gasóleo nos garaxes.
Esta non foi a única alerta veciñal na capital lucense debido a un forte cheiro a este combustible. Residentes na Calzada da Ponte tamén se puxeron en contacto coa Policía Local polo mesmo motivo.
"Estes días o cheiro era moi intenso no baño, pero non afectaba o resto da vivenda", afirmaba unha veciña da zona, próxima ao hospital San José.
Esta afectada aseguraba que a situación, que cualificou como "insoportable", foi "a peor" este xoves durante a tarde cando, segundo dixo, cheiraba "toda a rúa e toda a vivenda".
Esta veciña da Calzada da Ponte chegou a asegurar que na súa familia sufriron "mareos e náuseas" debido a este cheiro que, ao seu xuízo, podería ter a súa orixe nalgunha vertedura.
A presenza dos axentes da Policía Local tamén foi requirida por veciños da Rúa Portugal tamén por un forte cheiro a gasóleo.
