Un forte cheiro a gasoil na contorna dun pozo de tormenta situado no parque do Miño, preto da Tolda, e noutros puntos ao longo do paseo cara á Fervenza fixo que varias persoas que camiñaban polo lugar desen a voz de alarma tanto ao Concello como á Xunta, pero este venres pola noite seguía sen coñecerse a orixe da vertedura, segundo a información facilitada por ambas as administracións.
O goberno local informou de que non tiña coñecemento de ningún fallo na infraestrutura de saneamento, á que pertencen os pozos de tormenta. A Policía Local desprazouse ao lugar para facer un informe da situación e tratar de determinar a causa do cheiro. Non hai constancia tampouco de que o combustible chegase ao río.
A falta de información sobre o ocorrido deu lugar a que algúns cidadáns especulasen coa posibilidade de que a vertedura de gasoil estivese relacionado coa caza de xabarís con arco que a Xunta ten previsto facer nas próxima semanas.
O gasoil é un bo reclamo para estes animais e con el trataríase de facer que se dirixisen a un lugar desde o que fose fácil apuntarlles. Nas proximidades do pozo de tormenta da Tolda hai unha zona de maleza e vexetación moi alta, que podería ser utilizada polos porteiros para ocultarse.
Con todo, a delegación territorial da Consellería de Medio Ambiente aclarou que a vertedura nada tiña que ver coa caza do xabaril. A Xunta descoñecía, ademais, a orixe, ao tratarse dunha zona e dunha infraestrutura de titularidade municipal.
Ata a zona desprazáronse membros do BNG, quen indicaron que pedirán información sobre o ocorrido ao Concello e á Xunta. O portavoz nacionalista, Rubén Arroxo, constatou cheiro a gasoil en puntos illados desde A Tolda ata a depuradora.
