A caída este martes dunha das ramas principais dun cedro xunto aos xogos infantís do parque Rosalía de Castro puido acabar en traxedia, aínda que todo quedou nun susto debido a que se rexistrou sobre as dez da mañá, cando aínda non había nenos nin usuarios nesta emblemática zona verde da cidade.
Pero o estrondo provocado polo esborralle da árbore si sorprendeu aos clientes da cafetería do Parque e aos doutra da rúa Pascual Veiga, algúns dos cales correron a ver se había algunha persoa ferida. Por sorte, só quedou afectado parte do mobiliario urbano, pero as consecuencias puideron ser terribles, ao tratarse dunha zona onde todas as mañás acoden nenos procedentes de ociotecas, de campamentos urbanos ou acompañados dos seus pais e avós.
Tras ser avisados do incidente, á zona desprazáronse operarios de Calfensa - a empresa adxudicataria da xestión das zonas verdes- para retirar os restos da árbore e reparar un banco danado.
Pola súa banda, o Concello explicou que a empresa que realiza o mantemento do Parque efectúa controis periódicos para supervisar o seu estado. Engade que se fará outra inspección de todo o arboledo e unha investigación para tratar de pescudar as causas que provocaron o incidente, aínda que tras unha primeira supervisión os operarios detectaron que a rama da árbore estaba verde e que podería caer como consecuencia do seu gran peso.
Desde o Concello tamén se indica que se procederá a revisar as árbores da mediana da rúa Ramiro Roda, onde hai uns días os veciños alertaron de que estaban enfermos.
