O autoemprego é unha das principais alternativas que teñen hoxe en día os noveis para incorporarse ao mercado laboral. A Asociación de Novos Empresarios (Aje) de Lugo entregou este xoves os seus premios, que cumpriron este ano a súa sexta edición, cos que recoñece o atrevemento dos que dan ese paso na complicada conxuntura económica actual.
O premio de mozo emprendedor recaeu no fisioterapeuta monfortino Daniel Rodríguez e o de nova iniciativa empresarial en Legalmit, plataforma dixital promovida polas irmás Seara, as avogadas María e Leticia, que están aloxadas no viveiro de empresas da Fundación CEL-Iniciativas por Lugo.
Aje Lugo tamén concedeu tres accesits, o de innovación á enxeñería Aleutos Solutions, que tamén se atopa nos viveiros da CEL; o de responsabilidade social empresarial á lucense Robur Enxeñería e o de creación de emprego ao establecemento de hostalería monfortino Garden Cocktail Bar e Restaurante.
Ademais concedéronse tres accésits a outras tantas pemes: Aleutos Solutions, Ruber Enxeñería e Garden Cocktail Bar e Restaurante
Todos os galardoados reciben unha bolsa de formación e os dous premios principais ademais unha achega económica de 500 euros cada un para gastos de consolidación das sociedades.
COMPETITIVIDADE. Á gala de entrega destes galardóns, na que interveu como mestre de cerimonias o xornalista de El Progreso Javier Rivera, asistiu o conselleiro de Economía, Emprego e Industria, Francisco Conde, quen afirmou na súa intervención que "o espírito emprendedor é a base para contar cunha Galicia máis competitiva, xeradora de riqueza e de emprego de calidade".
Francisco Conde deu a coñecer que nos dez primeiros meses deste ano creáronse 308 empresas en Lugo, unhas 1.200 nos últimos tres anos, cun capital próximo aos 60 millóns de euros, segundo apuntou.
O conselleiro de Economía considera que Lugo conta con todos os elementos para "consolidar o seu crecemento empresarial", que, ao seu xuízo, son "un tecido experimentado; potencial para despuntar nun novo sector estratéxico como o dos avións non tripulados, a través do polo aeroespacial de Rozas; a forza dos emprendedores e o apoio da administración galega".
Lara Méndez recordou que o día 29 celebrarase unha gala para conmemorar os 15 anos do CEI-Nodus, a mesma idade de Aje Lugo
FIXAR POBLACIÓN. A alcaldesa de Lugo, Lara Méndez, que tamén estivo presente no acto de entrega, afirmou que desta forma recoñécese "o talento e a iniciativa empresarial, que contribúen a fixar poboación, crear emprego e dinamizar a economía".
"Non podemos concibir o crecemento da sociedade sen o tecido empresarial", afirmou na súa intervención a rexedora lucense, que engadiu que estes recoñecementos son "un acicate para as empresas para seguir medrando".
Lara Méndez recordou que o viveiro de empresas municipal do CEI-Nodus cumpriu 15 anos, como Aje Lugo, polo que o Concello celebrará o próximo día 29 unha gala para conmemorar ese importante aniversario.
A presidenta de Aje Lugo, Noelia López, que leva seis meses á fronte desta asociación, destacou que estes premios pretenden "visibilizar" o traballo e o esforzo dos mozos por emprender.
Ao acto tamén acudiron a subdelegada do Goberno, Isabel Rodríguez; o deputado provincial de promoción económica e social, Pablo Rivera; o concelleiro de desenvolvemento local e emprego e expresidente de Aje Lugo, Mauricio Repetto; a xefa territorial de Economía, Emprego e Industria, Pilar Fernández; o secretario xeral da CEL, Jaime López, e o coordinador de negocio institucional de Abanca en Lugo, Óscar Rodríguez.
Asesoramento
Legalmit é unha plataforma que permite conectar a particulares con avogados, as 24 horas do día durante os 365 días do ano, para celebrar acordos legais en liña, a través de videoconferencia certificada. Esta iniciativa contou para a súa posta en marcha co apadriñamento do programa Explorer —como Aleutos Solutions— e da aceleradora Vía Galicia.
Accesits
Se Aleutos e Ruber, que se dedican ao sector forestal, botaban a andar o verán pasado, Garden Cocktail é a máis veterana, con case 20 meses.