Un matrimonio e un amigo de ambos sentaron este mércores no banco dos acusados da Audiencia Provincial de Lugo por vender supostamente droga a menores de idade na súa vivenda da capital lucense, uns feitos polos que se enfrontan a sendas penas de catro anos e medio de cárcere. Os acusados, que vivían no mesmo piso, negaron os feitos e aseguraron que a trasfega de persoas que a Policía Nacional observou entrando e saíndo do inmoble non se dirixía a comprar estupefacientes ao seu domicilio. "ían a casa dunhas veciñas, non á nosa. Nós soamente recibiamos visitas da familia", sinalaron.
Segundo reza o escrito de acusación do ministerio fiscal, nos meses de xaneiro e febreiro de 2018, a parella –J.G.J. e M.A.R.M.– residían nun piso da rúa Lamas de Prado, onde supostamente "viñan dedicando á venda de sustancias estupefacientes. Neses trapicheos tamén participaba supostamente o outro acusado con iniciais C.A.V.L. que compartía domicilio co matrimonio e os seus catro fillos. A acusación pública mantén que os acusados traficaban con cocaína e haxix e que a venda se realizaba de forma indiscriminada entre maiores e menores de idade, aínda que só de resina de cannabis respecto destes últimos", explica.
A Policía Nacional tivo coñecemento destes feitos e montou un dispositivo de vixilancia na zona. Segundo explicou naquel momento o portavoz policial, os efectivos do Grupo I da brigada provincial da Policía Xudicial abriron unha investigación, na que resultou fundamental a colaboración cidadá.
Os veciños comunicaron ás forzas da orde que sospeitaban que nunha vivenda da Rúa Lambas de Prado, na zona próxima ás Casas Sindicais, se trapicheaba con droga. Os investigadores montaron un dispositivo de vixilancia nos arredores do inmoble e interceptaron a varias persoas "que entraban e saían da vivenda tras adquirir droga". Os axentes interceptaron a varios compradores e ademais realizaron un rexistro no piso, no que requisaron 860 euros en billetes fraccionados, unha navalla con restos de haxix, unha culler de plástico con restos de cocaína, varias bolsas de plástico transparente e unha bolsa con diversos recortes plásticos. Tamén localizaron 16 bolsitas termos seladas con cocaína e varios anacos de resina de cannabis.
Sobre o rexistro, os dous homes recoñeceron que consumían droga, pero insistiron en que non traficaban con ela. O matrimonio sinalou que os estupefacientes eran do outro acusado e que non sabían que tiña droga no domicilio que non fose para o seu propio consumo. "O meu sobriño díxonos que vivía na rúa", explicou J.G.J., "e pediunos se se podía quedar un día a durmir na nosa casa. Dixémoslle que si, pero o fomos coñecendo e xa quedou. Cando foi o rexistro da Policía xa levaba vivindo alí dous anos. ás veces invitábame a min a cocaína ou a fumar haxix, pero eu nunca lle vin vendendo droga en casa nin en ningún sitio".
A Fiscalía considera que os tres acusados son autores dun delito contra a saúde pública, polo que solicita catro anos e medio de cárcere e 800 euros de multa.
