O xulgado do Penal número 2 de Lugo celebrou este mércores un xuízo contra un home acusado de golpear a súa parella cun nivel de obra e romperlle un brazo, uns feitos polos que a Fiscalía de Lugo solicitou no seu escrito de conclusións provisionais unha condena de catro anos de prisión.
Segundo as alegacións da acusación pública, sobre as dúas e media do mediodía do 19 de xullo de 2018, o acusado discutiu coa súa esposa —coa que levaba case 40 anos casado— e golpeouna "con ánimo de ocasionarlle un menoscabo físico". Ademais, nun momento da disputa, o home colleu "un nivel de albanelería" e golpeou a súa esposa, "causándolle unha fractura do óso cúbito do antebrazo dereito". Por estes feitos, a muller sufriu lesións das que tardou un total de 320 días en recuperarse.
Tras a agresión, o acusado foi detido e o xuíz acordou o seu ingreso en prisión provisional, onde permaneceu sete meses. Ademais, acordou unha orde de protección a favor da muller.
A Fiscalía de Lugo acusou o presunto agresor dun delito de lesións, polo que solicita para el 4 anos de cárcere e cinco anos de afastamento da vítima. Ademais, pide que indemnice a muller na cantidade de 14.880 euros polas lesións ocasionadas e os días de curación. O ministerio fiscal explica que o home xa foi condenado a penas de traballos sociais polo menos noutras dúas ocasións, ambas no ano 2017, por delitos relacionados coa violencia de xénero, polo que lle aplica neste caso a circunstancia agravante de reincidencia.
O xuízo por estes feitos celebrouse o mércores no Penal número 2 de Lugo, despois de que o acusado rexeitase a posibilidade de recoñecer os feitos e chegar a un acordo co ministerio público. O xuízo quedou visto para sentenza.
