O ministerio fiscal solicita unha condena de 9 meses de prisión para un lucense acusado de empuxar á súa muller e tirala ao chan ás portas dun pub da capital. Os feitos, segundo argumenta o ministerio fiscal, sucederon sobre as tres e media da madrugada do 27 de maio de 2019, cando o acusado discutiu coa súa esposa nas inmediacións dun establecemento de hostalería.
Nun momento do enfrontamento, o home, presuntamente, empuxouna e tirouna ao chan, polo que a muller sufriu varias lesións e tivo que recibir asistencia médica.
O fiscal acusou ao home dun delito de lesións no ámbito da violencia de xénero, polo que solicita unha condena de 9 meses de prisión, así como dous anos de afastamento. Pide ademais que indemnice á vítima na cantidade de 350 euros por lesións e danos morais. O xuízo por este caso celebrouse este mércores no Penal 2, despois de que o acusado rexeitase a opción de recoñecer os feitos e pactar a pena co fiscal.
