A chama do Arde Lucus apagouse coa mirada posta en que na edición do próximo ano, a vixésima e na que aspira ao seu recoñecemento internacional, a festa de recreación histórica recupere todo o seu encanto e o seu poder de convocatoria, que este verán viu como foi unha máis das secuelas da pandemia.
A pesar de que o tempo non acompañou este domingo e a que a situación sanitaria obrigaba a que esta festa multitudinaria se vivise máis nas redes sociais que na rúa, algunhas das asociacións de recreación histórica quixeron manter vivo o espírito.
A festa despídese co desexo de que a próxima edición sexa a da súa internacionalización
Os guerreiros da tribo castrexa Clan de Breogán déronse, a media tarde, un paseo polo centro da cidade, co tramo da muralla da Mosqueira como punto e final.
Outras asociacións, como Cohors III Lucensium, Garda Pretoriana, Kertix e Lucus Equites, tamén se sumaron aos contidos e contados actos que se celebraron na rúa no día do adeus do XIX Arde Lucus.
A fonte de A Pinguela, en Porta Miñá, volveu ser o escenario das vodas celtas. Os contraentes que quixeron participar tiveron que facelo con cita previa, outro dos requisitos activados pola crise sanitaria.
A xornada de despedida, cun vídeo mapping nocturno incluído na Mosqueira, tamén se viviu nas redes sociais. Hipócrita Teatro representou a obra 19 pezas e 500 noites e as asociacións Terra Copora, Caetra Lucensium e Senatus Lucus programaron actos. Esta última, por exemplo, realizou visitas virtuais aos vestixios das termas romanas e da Domus do Mitreo.
