O Administrador de Infraestruturas Ferroviarias (Adif) adxudicou a redacción dos proxectos básico e de construción da nova terminal do tren en Lugo e o seu aparcadoiro subterráneo, que se enmarca na futura estación intermodal que dará servizo á capital lucense.
O proxecto tamén inclúe dous pasos inferiores, un entre as plataformas, que será de utilización exclusiva para os pasaxeiros, e outro peonil, de uso libre, que conectará ambos os lados da canle ferroviaria, así como a urbanización da zona.
O aparcadoiro subterráneo que se acondicionará estará dispoñible tanto para os usuarios da estación do tren como para os da de autobuses.
O organismo que depende do Ministerio de Fomento anunciou que adxudicou este contrato de servizos, que ten un prazo de execución de 15 meses, á Ute formada polas empresas Ines Enxeñeiros consultores e L35 Arquitectos por importe de 779.745,57 euros.
Este último estudo, con delegacións nunha decena de países, encargouse, entre outros proxectos, por exemplo do de remodelación do estadio do Real Madrid, o Santiago Bernabéu.
SEIS MESES DESPUÉS. Este compromiso foi adquirido polo ministro de Fomento, José Luís Ábalos, e a presidenta de Adif, a lucense Isabel Pardo de Vera, cando presentaron o anteproxecto da estación intermodal na casa consistorial de Lugo o pasado 4 de marzo.
Todas estas actuacións encagadas polo Administrador de Infraestruturas Ferroviarias deberanse acometer en coordinación coa futura estación de autobuses que construirá a Xunta de Galicia na Praza Conde de Fontao para que se poidan combinar estes dous medios de transporte público.
Catro millóns de euros son as estimacións que manexa a administración autonómica que investirá na construción da nova estación de autobuses da capital lucense, que convivirá coa do tren na futura intermodal.
¿A que se destinará?
Ese proxecto que se licitará en breve conterá tamén unha proposta de uso para os terreos da actual estación de autobuses. é unha demanda que formularon diferentes colectivos sociais, que apostan por unha gran praza e por dotacións públicas.
