O grupo ecoloxista Adega sacou onte á luz un informe da Consellería de Medio Ambiente no que se cuestiona o impacto que terá sobre o ecosistema da zona a ampliación do polígono do Ceao cara ao centro comercial As Termas. O informe da Dirección Xeral de Calidade Ambiental fíxose público o pasado 18 de maio e, segundo Adega, "cuestiona a viabilidade" do plan urbanístico deseñado para unha nova urbanización industrial que no PXOM denomínase Sector S-5.I.
"Tras constatar os salientables valores ambientais do ámbito afectado, onde se atopan varias nacentes do río Rato e existen abundantes formacións de bosque de ribeira e carballeiras, e detectar graves deficiencias non plan presentado –na identificación dos elementos naturais, na análise dos riscos de inundabilidade que afectan ao ámbito, falta de integración topográfica e paisaxística, etc.–, o informe xulga que a ordenación formulada supón unha ameaza directa sobre algúns destes valores e pode dar lugar a efectos ambientais significativos", indica o grupo ecoloxista.
CARENCIAS. Adega engade que o informe da Xunta considera que as cuestións que se apuntan condicionan a tramitación desta urbanización "a unha xustificación da necesidade de urbanizar o ámbito, a unha revisión global da ordenación proposta, con adopción de medidas que minimicen os seus efectos ambientais, e á execución previa de determinadas obras infraestruturais, imprevistas no plan urbanístico".
Os ecoloxistas tamén recordan que este proxecto urbanístico xa foi informado "desfavorablemente" por outros organismos, como a Confederación Hidrográfica do Miño-Sil, que indica que considera "inviable o plan, por non respectar toda a rede fluvial afectada, non garantir o mantemento da súa función como corredor ecolóxico e estudar incorrectamente os efectos de inundabilidade xerados pola mesma".
Ademais, di que o Instituto de Estudos do Territorio da Xunta de Galicia advertiu da falta de estudos obrigatorios en materia de paisaxe e informou do efecto negativo do plan sobre o bosque húmido existente, así como sobre a integridade da rede fluvial e das masas arbóreas e alertou do "incumprimento de varias normas por mor da ocupación urbanística inxustificada dun espazo de valor natural e ecolóxico".
Por todo iso, Adega, que recorda que presentou alegacións contra este plan xunto con outros colectivos, denuncia "a insustentabilidade e irracionalidade da nova urbanización industrial" e recorda que hai 125 hectáreas de chan con esta catalogación xa planificadas no municipio, que considera suficientes para cubrir a demanda durante décadas.
