Un home acusado de queimar varios colectores na capital non se presentou este mércores ao xuízo para intentar defenderse, a pesar de que a Fiscalía solicita para el unha condena de dous anos de cárcere.
O ministerio público mantén que o home -J.A.P.R., de 38 anos e natural de Friol- camiñaba pola rúa Tino Grandío na tarde do 11 de marzo de 2015 e prendeu lume a dous colectores, un de residuos e outro de papel.
O fiscal mantén que o home "arroxou no interior dos colectores algún tipo de obxecto ou sustancia que provocou que empezasen a arder, quedando o primeiro inutilizado e o segundo danado".
Segundo explicou unha testemuña que camiñaba ese día pola zona, o home intentou prender lume a unha chea de papeis cun chisqueiro. "Cando pasei por Tino Grandío observei que saía fume duns colectores, pero non vin a ninguén polas inmediacións. Seguín camiñando e, un pouco máis arriba, observei como un home intentaba prender lume a outro colector de papel, así que lle chamei a atención e el marchouse e meteuse nun bar próximo".
Os policías detivérono no bar e requisáronlle un chisqueiro. "Dixo que era para fumar, pero non tiña tabaco", declararon
Esta persoa explicou que un matrimonio que pasaba pola rúa tamén observou a escena e chamou por teléfono á Policía. "Os axentes chegaron enseguida e dixémoslles que o home se meteu nun bar. Démoslle a descrición física e eles entraron no establecemento e xa o detiveron".
A testemuña recoñeceu que non chegou a ver ao detido, pero os policías explicaron que só había unha persoa no interior do bar e que as súas características coincidían coa descrición achegada polas testemuñas. "Cacheámolo e lle requisamos un chisqueiro. Díxonos que era para fumar, pero nos estrañou porque non tiña tabaco", declararon.
O avogado da defensa pediu a libre absolución do home ao considerar que houbo "un erro" na detención. "O bar onde arrestaron ao meu cliente ten dúas portas, así que o incendiario puido entrar por unha e saír pola outra sen que o vise ninguén. Ademais, as testemuñas non chegaron a ver á persoa que levaba a Policía, así que non está claro que sexa a mesma persoa que intentaba queimar o colector".
O fiscal, con todo, considera que non hai dúbidas sobre a autoría, polo que solicitou a condena de J.A.P.R. como autor dun delito de danos mediante incendio, polo que lle pide dous anos de cárcere.
INDEMNIZACIÓN. Igualmente, a Fiscalía lucense pide que o acusado indemnice a Urbaser na cantidade de 788 euros polos danos ocasionados nos dous colectores.
Tal e como explicou un axente da Policía Nacional, un dos depósitos estaba totalmente calcinado e no outro aínda se estaba iniciando o lume, polo que lograron sufocalo. Aínda así, a representante de Urbaser explicou no xuízo que foi necesario cambiar os dous colectores e instalar uns novos.
O xuízo por este caso celebrouse no xulgado do Penal número 2 de Lugo e quedou visto para sentenza.
