As catas arqueolóxicas que se están desenvolvendo no atrio de catedral de Lugo dan continuidade á estratigrafía xa documentada nas escavacións que foron realizadas na Domus do Mitreo, segundo informou o arqueólogo Celso Rodríguez Cao, quen asegura que este enclave, situado entre a basílica e a muralla romana esconde "un importante depósito do mundo romano".
Este investigador sinala que "a tenor da información, escasa, pero moi interesante", todos os indicios apuntan á existencia dun "importante legado do mundo romano en capas inferiores", polo que fixo un chamamento ás distintas administracións a que se impliquen "nunha actuación máis ambiciosa, que permita descubrir e pór en valor" o pasado da capital lucense.
De feito, Rodríguez Cao supedita o alcance destas catas arqueolóxicas á posibilidade de darlles continuidade a uns traballos que comezaron o pasado luns, cos primeiros levantamentos de terra, pero que poderían terminar en breve, coa reposición do material e a colocación das pedras que conforman a superficie do atrio.
As escavacións pouco profundas tamén serviron para localizar a cimentación exterior da fachada neoclásica da catedral de Santa María
CALZADA. Ademais, o responsable destes traballos arqueolóxicos engadiu que as prospeccións realizadas, a unha profundidade que apenas chega aos 2,5 metros, permiten "delimitar o trazado dunha calzada que, ata o século XVIII conectaba o interior do recinto amurallado coa porta de Santiago".
As perforacións realizadas ao pé da fachada neoclásica da basílica sacaron á luz a cimentación exterior da edificación, cuxa construción se prolongou durante tres séculos, a partir do XV.
Ademais, ao fío dos datos previos achegados polo georradar e, en consonancia coas intervencións arqueolóxicas realizadas en claustro da catedral, está nova actuación permitiu afinar "aínda máis a delimitación do trazado da cloaca romana" da cidade.
Rodríguez Cao explicou que a cata realizada na parte central do atrio catedralicio, que é a máis profunda das tres practicadas, permitiu obter nova información sobre a evolución urbanística da cidade de Lugo, desde a época medieval ata a contemporánea, en sintonía cos achados obtidos en intervencións anteriores.
A profundidade alcanzada nesa intervención tamén permitiu localizar sepulturas semellantes ás documentadas nas prospeccións feitas na Domus do Mitreo, así como outras edificacións que darían continuidade ás identificadas noutras actuacións previas na contorna máis próxima.
