Un brote na residencia das Gándaras, a maior da provincia, conta con 49 positivos entre os usuarios. Non é a primeira vez que hai casos neste centro, xa que previamente houbo traballadores afectados, pero si a primeira na que hai contagios entre os residentes.
Todos os usuarios deste xeriátrico de 180 prazas foron cribados este luns despois de que un deles, agora ingresado no Hula, fóra diagnosticado de covid- 19 este fin de semana. Presumiblemente, o brote detectouse de forma similar ao achado hai uns días na residencia de Ribadeo: a través da PCR que fan aos pacientes antes do ingreso no hospital para saber se deben ser illados ou non.
Segundo puido saber este diario a gran maioría dos contaxiados atópanse ben e sen síntomas e só unha pequena parte ten febre.
Este brote é o de maior envergadura dos atopados en residencias de Galicia. Tamén este luns, a Consellería de Política Social informou doutro declarado no Centro de Atención a Persoas con Discapacidade (CAPD) de Redondela, que afecta a 37 usuarios.
O xeriátrico lucense, con 180 prazas, é o maior dos públicos de toda a provincia e non tivera casos de usuarios
Así, este luns, á marxe destes dous había 28 infectados na residencia García Irmáns, de Betanzos (A Coruña); 2 en Santo Estebo de Perlío, en Fene; 6 na vivenda comunitaria de Alfoz; 7 na residencia de maiores de Ribadeo; 1 na residencia de Chandrexa de Queixa; 24 na residencia Val de Monterrei; 5 na residencia Soremay; 3 na residencia Santa Marta e 1 na residencia DomusVi de Vigo. Tamén hai 14 positivos no Fogar e Clínica San Rafael, de Vigo, para persoas con discapacidade.
Logo de varios meses sen contagios nas residencias, unha vez que completouse a campaña de vacinación neses centros, os casos empezaron a reaparecer e crecer ao haber unha maior circulación do virus. Pese ao aumento dos contagios, as vacinas están a evitar, en gran número destes casos, que desenvolvan formas graves da enfermidade e moitos residentes pasan o período infectivo completamente asintomáticos ou con algúns moi leves.
