Unha lucense aceptou este mércores unha condena dun ano de prisión e 900 euros de indemnización tras recoñecerse autora dun delito de falsidade documental en concurso con outro de estafa, tras falsificar varios certificados da Casa da Muller do Concello co fin de non pagar na pensión na que estaba aloxada. O xuízo celebrouse no Penal 2.
Segundo a acusación da Fiscalía, recoñecida pola condenada, A.V.L. aloxouse nunha pensión de Lugo en decembro de 2015, tras pactar un prezo de 300 euros ao mes, cantidade que foi abonada pola irmá da muller.
Con todo, posteriormente A.V.L., coa intención de seguir aloxada na pensión pero sen abonar diñeiro algún, procedeu a elaborar varios documentos nos que supostamente as responsables da Casa da Muller recoñecíana como usuaria dos servizos sociais e concedíanlle axudas de urxencia por valor de 300 euros para aloxamento. Os documentos contiñan incluso un número de conta bancaria na que lle serían abonadas as axudas sociais.
Deste xeito, a agora condenada conseguiu permanecer na pensión tres meses máis, ata que o propietario da mesma se puxo en contacto co Concello, onde lle confirmaron que non había expediente algún en relación coa súa hóspede. Por iso, deberá abonarlle 900 euros.
