O Tribunal Supremo absolve un lucense condenado a seis meses de cárcere por un delito de desobediencia por saír á rúa en abril de 2020, saltándose así o primeiro confinamento decretado para conter a pandemia de covid, tendo en conta que o Tribunal Constitucional (TC) declarou que o estado de alarma que amparaba este tipo de restricións vulnerou a Carta Magna.
Nunha sentenza do pasado 8 de maio, relatorio do maxistrado Julián Sánchez Melgar, a Sala do Penal estima o recurso presentado por un veciño de Lugo que a noite do 17 de abril de 2020 foi sorprendido pola Policía Nacional na rúa en pleno confinamento. Segundo os feitos, os axentes preguntáronlle se tiña algunha xustificación para saltarse as restricións fixadas polo artigo 7 do Real Decreto 463/20, de 14 de marzo, polo que se declarou o primeiro estado de alarma.
O home contestoulles que "tiña perfecto dereito a estar na rúa" e que, a pesar de que xa o detiveran varias veces polo mesmo, seguiría facéndoo, augurando ademais que os axentes se cansarían antes de detelo que el de saír. "Non teño porqué ir a casa", espetoulles.
En consecuencia, foi detido dando lugar a un proceso penal que desembocou nunha condena por un delito de desobediencia a seis meses de cárcere e inhabilitación especial para o exercicio do dereito ao sufraxio pasivo.
O Supremo analiza a sentenza ditada o 14 de xullo de 2021 polo TC sobre o estado de alarma para concluír que "tal restrición aparece, pois, máis como "unha privación" ou "cesación" do dereito, por máis que sexa temporal e admita excepcións, que como
"A facultade individual de circular "libremente" deixa pois de existir, e só pode xustificarse cando concorren as circunstancias expresamente previstas no real decreto", acouta.
