Eloy Castro -investigado entre outros delitos polo caso Autocentrum e a usurpación da marca John Deere- saíu airoso do último xuízo por estafa celebrado contra el, xa que o maxistrado do Penal número 2 de Lugo absolveuno por falta de probas.
O acusado achegou un contrato asinado supostamente polo camioneiro que o denunciou, no que este recoñecía os quilómetros e os problemas técnicos que presentaba o vehículo que lle vendeu. O afectado asegurou que foi vítima dun engano e que nunca asinou ese documento, pero o xuíz conclúe que tiña que demostrar que falsificaran a súa firma. "Non se practicou ningunha proba pericial caligráfica neste caso, proba que puidese corroborar, no seu caso, as manifestacións do denunciante. Falta de proba que non pode prexudicar en ningún caso ao acusado", apunta.
O ministerio público solicitaba dous anos e medio de prisión para Eloy Castro por vender un vehículo co tacógrafo manipulado. Segundo alegaba, o acusado anunciou en internet unha cabeza tractora marca DAF, fabricada e matriculada en 2007 e con 412.000 quilómetros. No anuncio enumerábase todo o equipamento do vehículo, así como os extras e unha garantía de dous anos en toda Europa.
En xaneiro de 2012, un camioneiro gaditano contactou co acusado e pecharon a venda do vehículo por 30.680 euros. "Despraceime a Lugo", explicou o denunciante na vista, "e meteume moita présa para que lle entregase unha fianza de 500 euros porque dixo que tiña ao seu pai ingresado no hospital. Ademais deume só cinco días para que lle ingresase o diñeiro porque había máis xente interesada no camión. Eu pagueille e díxome que me levaba o camión ao concesionario de MAN en Madrid. Tardou máis dun mes e ao final chamoume e díxome que mo deixaron nunha gasolineira coas chaves escondidas na batería".
O transportista explicou que o vehículo marcaba 450.000 quilómetros, pero non lle deu importancia porque a diferenza co anunciado non era demasiada. Con todo, observou que non tiña os extras. Ademais, cando o levou a unha revisión, decatouse de que o tacógrafo estaba manipulado e púxose en contacto co anterior dono do camión. Segundo declarou este, vendeullo a Eloy Castro con 720.000 quilómetros.
O acusado dixo que o comprador viu o anuncio dun camión por internet, pero cando se trasladou a Lugo escolleu outro vehículo con máis quilómetros e asinaron un contrato recollendo as súas características. "Todo foi legal", dixo.
O xuíz conclúe que non hai probas pola contra e explica ademais que o denunciante incorreu nalgunhas contradicións durante a instrución, polo que absolve a Eloy Castro de estafa.
VÍTIMA DUN COMPLOT. Durante o xuízo, celebrado o pasado 10 de novembro, Eloy Castro utilizou o seu dereito á última palabra para mostrarse vítima dun "complot policial" e pedir axuda á Fiscalía. "Están a perseguirme desde o ano 2007 e levo moito tempo esperando para dicilo en sede xudicial. ¡Que alguén faga algo, por deus!", exclamou. O acusado cargou especialmente as tintas contra un inspector que o investigou en varias das múltiples denuncias contra el. "Foi ver aos meus empregados e coaccionounos para que declarasen na nula contra contra. Non hai dereito a isto", apuntou.
Dous dos seus traballadores, que declararan ante a Policía e en fase de instrución que na empresa do acusado manipulábanse os quilómetros dos vehículos, desdixéronse na vista e apoiaron a teoría de Eloy Castro. "Mentimos porque nos presionou a Policía", afirmaron. O acusado chegou a chorar no xuízo, supostamente emocionado ao escoitar aos seus empregados.
