A Audiencia de Lugo revogou unha sentenza do xulgado de Instrución número 1 de Lugo e absolveu de estafa a unha muller que encargou nunha tenda un revelado de fotos e finalmente non llas levou porque lle pareceron moi caras.
A sentenza explica que o 19 de novembro de 2018, a muller acudiu a unha tenda da Avenida da Coruña para revelar unhas fotografías. Unha vez realizado o traballo, o propietario do negocio díxolle que o prezo do revelado era de 100,75 euros, ante o cal a clienta lle explicou que non levaba tanto diñeiro, polo que deixou as fotos e díxolle que volvería máis tarde a recollelas. Ese mesmo día, o fotógrafo denunciou os feitos. O xulgado impúxolle unha multa de 360 euros, pero a muller recorreu e a Audiencia conclúe que non se dan os elementos" para o delito de estafa, polo que a absolve.
