Axentes da Policía Local de Lugo ordenaron a retirada por parte do guindastre municipal de catro coches de alta gama, con matrícula temporal holandesa, que estaban estacionados na Rúa Outono e cuxa procedencia agora se investiga, dado que os supostos propietarios non presentaron documentación algunha sobre as placas e tampouco tiñan subscrito o correspondente seguro obrigatorio.
Sucedeu o pasado venres –día 11 de setembro– pola tarde, cando unha patrulla da Policía de Barrio comprobou que na citada rúa había catro vehículos cunha matrícula temporal válida para tan só un día e de forma exclusiva en territorio holandés.
Os axentes comprobaron que os coches procedían de Bélxica, así como que as placas que portaban os vehículos non eran válidas “en ningún caso” para circular por ningún “outro país” que non fose Holanda.
Comprobaron, así mesmo, que a combinación alfanumérica desas matrículas pódese obter gratuitamente a través de Internet, polo que “poderían ser acuñadas en calquera taller e sen ningún tipo de autorización especial”, nin sequera un “código de homologación”, polo que son utilizadas “nalgúns casos” para “trasladar vehículos roubados a través de Holanda a outros países”, onde son rematriculados.
Por iso, os vehículos quedaron inmobilizados no depósito municipal, á espera de que sexa regularizada a súa situación en España e das “investigacións que serán levadas a cabo para confirmar que a procedencia dos vehículos é lícita”, a través da “Interpol, se fose necesario”, aclara a Policía Local nun comunicado.
