O delegado territorial da Xunta de Galicia en Lugo, José Manuel Balseiro, denunciou que o goberno galego leva esperando máis de dous anos a que o Concello da capital lucense firme o convenio para recuperar e pór en valor o túnel achado na Muralla romana, Patrimonio da Humanidade, á altura do cubo VI.
En declaracións aos medios de comunicación, Balseiro precisou que a Xunta de Galicia redactou o proxecto e dispón de licenza municipal para executar as obras, que contan cun orzamento de 65.000 euros, pero recordou que o acceso a ese punto da Muralla romana pasa por un terreo de titularidade municipal.
Por iso, o goberno galego remitiulle "hai dous anos" unha proposta de convenio ao Concello de Lugo, pero transcorrido todo ese tempo, a día de hoxe, a Xunta de Galicia non tivo "noticia" do mesmo por parte da administración local.
"Temos o proxecto, temos a licenza, pero estamos a esperar para asinar ese convenio", dixo Balseiro, quen espera que poida liquidarse este trámite canto antes para iniciar as obras.
