A presenza de niños de velutina en moitas árbores do parque do Miño inquieta os usuarios dese espazo público, moi transitado. A alarma, con todo, non está xustificada, explica Marcos Varela, da Asociación Galega de Apicultura.
Aínda que hai peticións para que se eliminen eses niños, tiralos agora non tería maior sentido, apunta Varela, xa que nesta época están baleiros e, ademais, a velutina non os reutiliza.
Os niños agora á vista non teñen ningún perigo; as avespas formarán outros novos en canto regresen co bo tempo
"Son nenos secundarios", explica Varela, que conta que a velutina só reutiliza como moito os niños primarios das raíñas. Pero en canto estas desenvolven unha comunidade cun grupo de obreiras, forman un niño secundario e só o utilizan durante unha tempada, explica.
A presenza de tantos niños na contorna do río ten sentido. Primeiro, porque a expansión da especie foi exponencial nos últimos anos e, segundo, porque buscan contornas nas que hai árbores e auga, explica Varela.
Agora, ao non haber follas, ven máis. Pero eses niños non son preocupantes; serano os que se formen en canto chegue a calor e a especie volva expandirse.
