O tenente de alcalde, Rubén Arroxo, xunto coa edil de Participación, Cristina López, visitaron Da Lonxa ao Prato, a nova pescadería que vén de iniciar a actividade nos postos 21 e 22 do Mercado Municipal.
Da Lonxa ao Prato ofertará a diario peixe procedente da Lonxa de Ribeira, "aumentando os negocios con produtos de calidade polos que se caracterizan a Praza de Abastos e o Mercado Municipal", explicou Cristina López.
A edil de Participación e o tenente de alcalde visitaron o posto e déronlle a benvida o novo negocio. Cristina López explicou que "seguimos traballando para ocupar a totalidade dos postos da Praza de Abastos e do Mercado Municipal con propostas de calidade, que atendan as demandas da veciñanza".
A edil de Participación declarou que "en Lugo contamos cun mercado dinámico e actual, con produtos de proximidade e con escasa manipulación, e con postos atendidos por profesionais que demostran día a día a súa experiencia no sector". "A peonalización de Quiroga Ballesteros aumentará a cantidade de visitantes destas dúas instalacións históricas da cidade como son a Praza e o Mercado", declarou Cristina López.
