David Vila mudarase en breve ao centro histórico e, no seu caso, achegarse ao centro suporá un aforro considerable dos gastos de aluguer. "Pagaba 320 euros ao mes por un piso no Castiñeiro e agora pagarei 187", explica
Vila recibiu o luns da man do delegado da Xunta en Lugo, José Manuel Balseiro, as chaves dun dos pisos de promoción pública que a Xunta rehabilitou na Tinería. Trátase dun dúplex, con baño e aseo, salón, dúas habitacións, lavadoiro, cociña e zona de despacho, cunha superficie total de 85 metros cadrados. "Cando mo ensinaron dixen que tamén me valería algo un pouco máis pequeno porque vivo só", admitiu Vila, que presentou a solicitude fai máis dun ano.
Os pisos entréganse por sorteo entre os beneficiarios a medida que están dispoñibles, ou ben porque algún dos anteriores inquilinos vaise ou ben porque se incorpora algún novo ao parque inmobiliario que ten a Xunta na zona. Móstraselle ao inquilino e se este decide renunciar pode volver optar a outro máis adiante pero inicialmente ten unha penalización dun ano, de forma que durante ese período non se lle ofrecerá vivenda algunha.
Vila está moi satisfeito co piso que lle tocou e á expectativa cos locais nocturnos próximos por se percibe ruídos desde el. A súa nai, Paz Díaz, que lle acompañou a recoller as chaves, recoñece que, á marxe do ruído, a zona non lle entusiasma, a pesar de estar moi céntrica porque lle faltan servizos e cre que "non ten moi bo ambiente". A pesar de todo, admite que o dúplex é amplo e bonito e que suporá un aforro moi positivo para David.
25 NUN ANO. O delegado da Xunta explicou o luns que, desde marzo do ano pasado, entregáronse as chaves de 25 vivendas de promoción pública situadas na Tinería. Ademais das de David Vila, o luns tamén se entregou a unha beneficiaria que non puido acudir ao acto público as chaves dun inmoble en Fermín Rivera.
Balseiro recordou que esa entrega de pisos rehabilitados é "un proceso continuo que a Xunta ten en marcha ao longo de todo o ano, segundo se vaian producindo as vacantes".
Tamén explicou que os interesados en optar a algunha desas promocións poden inscribirse no rexistro único de demandantes de vivenda, ao que se pode acceder tanto a través da sede electrónica da Xunta como nas oficinas do Instituto Galego de Vivenda e Solo (IGVS).
Destacou a aposta da Xunta polo barrio e recordou que ten en marcha proxectos como o da rehabilitación de catro novos edificios de vivendas, cun investimento de máis dun millón de euros.
