Os tres socios acusados de cometer unha estafa millonaria coa venda e exportación de teléfonos móbiles -J.M.D.V., P.C.M. e M.C.A.- declararon este mércores na Audiencia Provincial de Lugo que actuaron en todo momento "conforme á legalidade". Segundo explicaron ante a sala, levaban a contabilidade das súas actividades comerciais "de forma meticulosa" e seguían as instrucións "da xente de Aduanas" para realizar as exportacións.
Tal e como sinalaron, os problemas das súas empresas comezaron cando a Axencia Tributaria lles paralizou as devolucións do Iva de 2006. "Era máis dun millón de euros e iso asfixiounos. A partir dese momento non puidemos facer fronte ao pago dos impostos, pero declarábase todo. Xamais houbo ánimo de ocultar nada e é Hacienda a que nos debe diñeiro a nós. O importe das devolucións do IVE é moi superior aos importes que deixamos de pagar".
Segundo explicaron, dirixíronse á Axencia Tributaria en multitude de ocasións para reclamarlle as devolucións do IVE. "Non sabiamos o que estaba a pasar. Realizáronnos tres inspeccións e saíron favorables a nós. O tribunal económico acordou que nos tiñan que devolver o diñeiro, pero en lugar diso solicitáronnos o pago do imposto de sociedades por vía de Instrución", apuntaron.
Un dos acusados, M.C.A., que se dedica á avogacía, relatou todos os "esforzos" que realizaron os tres socios para cumprir as súas obrigacións coa Axencia Tributaria. "Chegamos a dicirlle a Hacienda que a autorizabamos a pór cámaras no noso almacén para que vixiase a nosa actividade. Cando deixaron de abonarnos as devolucións do IVE tivemos que presentar avais persoais para devolver as pólizas de crédito. Eu cheguei a facer unha hipoteca sobre o meu despacho e aínda estamos a pagar a cota entre os tres. Xamais houbo ánimo de tapar nin de ocultar nada", insistiu.
Sobre as exportacións, explicaron que tampouco intentaron ocular nada. "Enviabamos a mercancía por empresas de mensaxería e en Aduanas podían revisala cando quixeran. De feito, en ocasións facíano e sempre ía todo ben documentado".
Durante a xornada deste mércores tamén declarou ante a sala o acusado J.M.N.V., que en 2006 era o xestor que levaba a contabilidade das empresas dos tres socios. Segundo explicou, cando deixaron de devolverlles o IVE revisaron todas as contas e atoparon un desaxuste. "Eles declararon compras de móbiles a Carrefour por 600.000 euros e o centro comercial declarou vendas por 900.000. Era unha diferenza enorme e expómonos diferentes hipóteses sobre o que podía pasar. Finalmente, a Axencia Tributaria pediulle a documentación a Carrefour e eles recoñeceron que había un erro. Presentaron outra vez as contas e practicamente coincidían co que declararan os socios".
Aínda así, segundo a versión dos acusados, este erro alleo a eles serviu para que se puxese en dúbida a súa xestión, que acabou nos xulgados. A vista seguirá a próxima semana coa declaración de testemuñas e peritos.
